Ýewropanyň Täzeleniş we Ösüş Banky (ÝÖBB) hususy pudagy goldamaga, ulag-logistika infrastrukturasyny ösdürmäge we halkara maýasyny çekmäge aýratyn üns bermek bilen, Türkmenistanda maýa goýum işini giňeltmegi maksat edinýär.

ÝÖBB-niň Türkmenistandaky wekilhanasynyň ýolbaşçysy Erik Liwniniň Trend agentligine beren interwýusynda belleýşi ýaly, bank eksport ugurly hususy kompaniýalary gönüden-göni maliýeleşdirmegi gaýtadan ýola goýmak, şeýle hem ýerli täjirçilik banklarynyň üsti bilen kiçi we orta telekeçiligi karzlaşdyrmagy giňeltmek mümkinçiligine seredýär.

Maýa goýumlary üçin geljegi uly ugurlaryň hatarynda gaýtadan işleýän senagat, agrobiznes, logistika, eksport ugurly hyzmatlar we demir ýol infrastrukturasyny döwrebaplaşdyrmak, şol sanda Transhazar ulag geçelgesiniň çäklerindäki taslamalar bar. Şeýle hem ÝÖBB gaýtadan dikeldilýän energiýa, energiýa netijeliligi, suw üpjünçiligi we galyndylary dolandyrmak ugurlarynda hyzmatdaşlyk mümkinçiliklerini öwrenýär.