Ermenistanyň Ykdysadyýet ministri Gevorg Papoýan Aşgabatda Türkmenistan bilen ykdysady hyzmatdaşlygy giňeltmegiň geljegi uly ugurlaryny kesgitledi. Olaryň hatarynda senagat, oba hojalygy we azyk önümlerini gaýtadan işlemek, ulag we logistika, sanly çözgütler hem-de syýahatçylyk bar.

1-nji oktýabrynda Türkmenistanyň Maýa goýum forumynda çykyş eden ministr iki ýurduň ykdysadyýetleriniň biri-biriniň mümkinçiliklerini üsti ýetirýändigini belläp, täze maýa goýum we söwda taslamalaryny ösdürmäge Ýerewanyň gyzyklanýandygyny nygtady.

Papoýan ulag gantaşygyna aýratyn üns berdi. Ministriň aýtmagyna görä, Ermenistanyň «Parahatçylygyň çatrygy» başlangyjy, şol sanda TRIPP taslamasy Merkezi Aziýa we Hazar sebitiniň ýurtlary üçin Türkiýäniň we Ýewropanyň ugry boýunça goşmaça üstaşyr geçiş mümkinçiliklerini döredip, şeýle hem Eýran arkaly «Demirgazyk–Günorta» ulag geçelgesi bilen baglanyşygy üpjün edip biler.

Papoýan Ermenistanyň maýa goýum mümkinçiliklerini hem tanyşdyrdy. Olaryň arasynda Ýewraziýa Ykdysady Bileleşiginiň (ÝYB) bazaryna çykmak, Ýewropaly hyzmatdaşlar bilen hyzmatdaşlyk etmek we ösen tehnologiýa pudagy bar. Ministriň sözlerine görä, ýurt işewürlik gurşawyny gowulandyrmak, ygtyýarnama almak üçin zerur wagty azaltmak we döwrebap senagat zolaklaryny döretmek boýunça işleri alyp barýar.