«TMT Consulting Group» we «Amatly Çözgüt» Litwanyň «Teltonika» kompaniýasy bilen hyzmatdaşlyk barada ylalaşdy

«TMT Consulting Group» we «Amatly Çözgüt» kompaniýalarynyň wekilleri Litwanyň halkara tehnologiýa kompaniýasy bolan «Teltonika» bilen gepleşik geçirdiler. Duşuşygyň dowamynda taraplar hyzmatdaşlygyň geljegini ara alyp maslahatlaşdylar hem-de häzirki zaman telekommunikasiýa we IoT çözgütleri boýunça hyzmatdaşlyk barada ylalaşyga geldiler. Gepleşikleriň dowamynda logistika, awtoulag parkyny dolandyrmak, senagat we sanly infrastruktura üçin innowasion tehnologiýalary ornaşdyrmak meselelerine aýratyn üns berildi. Taraplar bilelikdäki işiň uly mümkinçilikleriniň bardygyny belläp, uzak möhletleýin hyzmatdaşlygy ösdürmäge gyzyklanma bildirdiler.

«Teltonika» Internet zatlary (IoT) we M2M tehnologiýalary ugrunda dünýäniň öňdebaryjy kompaniýalarynyň biridir. Kompaniýa 1998-nji ýylda Litwada esaslandyryldy we häzirki wagtda önümlerini dünýäniň 140-dan gowrak ýurduna eksport edýär. Kompaniýanyň esasy ugurlary GPS/GLONASS trekerlerini, senagat 4G/LTE routerlerini, tor geçelgelerini we kommutatorlaryny öndürmekden ybaratdyr.
«Teltonika»-nyň ähli önümleri diňe kompaniýanyň Litwadaky — Wilnýus we Moletai şäherlerindäki öz zawodlarynda işlenip taýýarlanylýar we öndürilýär. Ýyllyk önümçilik möçberi takmynan 6 million enjama ýetýär. Bu enjamlar ulag, energetika, senagat we “akylly şäher” taslamalarynda giňden ulanylýar.
Gazanylan ylalaşyk öňdebaryjy Ýewropa tehnologiýalaryny ornaşdyrmak we halkara hyzmatdaşlygy giňeltmek üçin täze mümkinçilikleri açýar.

TMT Habarlar