Türkmenistanyň Hökümeti bilen Birleşen Milletler Guramasynyň Ösüş Maksatnamasy (BMGÖM) gaýtadan dikeldilýän energiýany ösdürmek boýunça bäş ýyllyk ylalaşyga gol çekdi. Taslama ýurduň uzakdaky ilatly ýerlerinde umumy kuwwaty 2 MWt-a çenli bolan 10-a çenli synag görnüşli kiçi Gün elektrik stansiýasyny gurmagy göz öňünde tutýar. Ylalaşyga 2026-njy ýylyň 11-nji noýabrynda Antalýada BMG-niň Howanyň üýtgemegi boýunça konferensiýasynyň (COP31) çäklerinde gol çekildi.

Başlangyjy durmuşa geçirmek üçin Ählumumy ekologiýa gaznasy (GEF) tarapyndan 4,17 million ABŞ dollaryndan gowrak serişde bölünip berildi. Taslama Birleşen Milletler Guramasynyň Taslamalara hyzmat etmek boýunça edarasy (UNOPS) tarapyndan Türkmenistanyň degişli ministrlikleri bilen bilelikde amala aşyrylar. Gün energiýasy desgalaryny gurmak bilen bir hatarda, ýene-de 120 sany uzakdaky ilatly ýerde şeýle ulgamlary ornaşdyrmak mümkinçiligini kesgitlemek üçin tehniki-ykdysady bahalandyrmalary we tehniki resminamalary taýýarlamak meýilleşdirilýär.

Başlangyjyň esasy maksady gaýtadan dikeldilýän energiýa çeşmelerinden peýdalanmagy giňeltmek, elektrik üpjünçiliginiň ygtybarlylygyny ýokarlandyrmak we ekologiýa taýdan arassa energetikany ösdürmekden ybaratdyr. Şeýle hem taslama kadalaşdyryjy-hukuk binýadyny kämilleşdirmegi, hünärmenleri taýýarlamagy we Türkmenistanyň gaýtadan dikeldilýän energiýa hem-de howanyň üýtgemegi boýunça strategiýalaryna laýyklykda milli mümkinçilikleri pugtalandyrmagy göz öňünde tutýar.