Aşgabatda Türkmenistanyň TIF 2026 maýa goýum forumy geçirildi. Forum işewür toparlaryň we halkara hyzmatdaşlaryň wekillerini bir ýere jemläp, maýa goýum hyzmatdaşlygynyň geljegi bilen bagly meseleleri ara alyp maslahatlaşmak üçin möhüm meýdança öwrüldi.

Forumyň çäklerinde Türkmenistanyň daşary ýurtly hyzmatdaşlar bilen bilelikdäki taslamalary ösdürmäge, önümçilikleri ýerli şertlerde ýola goýmaga we häzirki zaman tehnologiýalary ornaşdyrmaga bolan gyzyklanmasy bellenildi. Ykdysadyýeti diwersifikasiýalaşdyrmaga, gaýtadan işleýän senagaty, oba hojalyk-senagat toplumyny, gurluşyk pudagyny, sanly tehnologiýalary we «ýaşyl» energetikany ösdürmäge aýratyn üns berilýär.

Hyzmatdaşlyk üçin ýangyç-energetika, himiýa we nebitgaz gaýtadan işleýän pudaklarynda, şeýle hem ulag we üstaşyr geçelgeler ulgamynda hem uly mümkinçilikler saklanyp galýar.

«Ojar Aziýa» kompaniýasy forumyň Baş hemaýatkär hökmünde öz goşundany goşdy. Bu Forum tejribe alyşmak, işewür gatnaşyklary ýola goýmak we halkara maýa goýum hyzmatdaşlygynyň täze mümkinçiliklerini ara alyp maslahatlaşmak üçin möhüm meýdança boldy.

Nobatdaky geçirilen Forum Türkmenistanyň daşary ýurtly hyzmatdaşlar bilen hyzmatdaşlygy giňeltmäge we durnukly ykdysady ösüşe, tehnologiki döwrebaplaşdyrmaga hem-de işewürlik üçin täze mümkinçilikleri döretmäge gönükdirilen taslamalary durmuşa geçirmek üçin amatly şertleri döretmäge bolan ygrarlylygyny görkezýär.