22-nji oktýabrda Aşgabatda iki ýurduň telekeçileriniň arasynda söwda-ykdysady hyzmatdaşlygy ösdürmäge we işewürlik gatnaşyklaryny giňeltmäge gönükdirilen «Türkmenistan – Hytaý (Şansi welaýaty)» işewürlik forumy geçiriler. Çäräni Türkmenistanyň Senagatçylar we telekeçiler birleşmesi guraýar.

Maslahatyň gün tertibine maýa goýum taslamalary, döwrebap tehnologiýalary ornaşdyrmak we ikitaraplaýyn hyzmatdaşlygy mundan beýläk-de ösdürmegiň geljegi bilen bagly meseleler giriziler.

Forum Türkmenistan bilen Hytaýyň kompaniýalarynyň arasynda göni işewürlik gatnaşyklaryny ýola goýmak, tejribe alyşmak we hyzmatdaşlygyň täze ugurlaryny kesgitlemek üçin möhüm meýdança bolar.

“TMT Consulting Group” we “Ojar Asiýa” kompaniýalary öňde boljak çärä işjeň gatnaşarlar. Bu kompaniýalar Hytaý bilen işewürlik hyzmatdaşlygyny pugtalandyrmaga, halkara gatnaşyklary ösdürmäge we telekeçiler üçin täze mümkinçilikleri döretmäge hem işjeň goşant goşýarlar. Bu işleriň dowamy hökmünde 2026-njy ýylyň noýabr aýynda Şanhaýda geçiriljek forum indiki tapgyr bolar. Ol hyzmatdaşlyk gatnaşyklaryny ýola goýmak we bilelikdäki taslamalaryň geljegini ara alyp maslahatlaşmak üçin goşmaça mümkinçilikleri döreder.

Türkmenistan bilen Hytaýyň arasynda işewürlik dialogynyň ösdürilmegi maýa goýum hyzmatdaşlygyny giňeltmäge, innowasion çözgütleri ornaşdyrmaga we iki ýurduň bazarlarynda işewürlik üçin täze mümkinçilikleri döretmäge şert döredýär.