2025-nji ýylyň jemlerine bagyşlanyp 13-nji fewralda geçirilen Ministrler Kabinetiniň giňişleýin mejlisiniň dowamynda Türkmenistanyň Prezidenti 2026-njy ýyl üçin çig pile öndürmegiň ýyllyk meýilnamasyny tassyklaýan Karara gol çekdi. 

Resminama laýyklykda, "Türkmenpagta" döwlet konsernine hem-de welaýatlaryň häkimliklerine 2026-njy ýylda 2 müň 100 tonna çig pile öndürmegi üpjün etmek tabşyryldy.

Bellenilen wezipeleri ýerine ýetirmegiň çäklerinde döwlet konsernine pile öndürmek boýunça welaýatlaryň häkimlikleri bilen baş şertnamalary baglaşmak, şeýle hem daýhan birleşiklerini, oba hojalyk kärhanalaryny, daýhan hojalyklaryny, kärendeçileri we ýer eýelerini ýüpek gurçugynyň ýokary hilli tohumynyň zerur mukdary bilen üpjün etmek tabşyryldy.

Çeşme: www.tdh.gov.tm