Türkmenistanyň we Ukrainanyň Söwda-senagat edaralary ikitaraplaýyn işewür hyzmatdaşlygy giňeltmäge bagyşlanan bilelikdäki wideokonferensiýany geçirdiler.

Duşuşygyň esasy meseleleriniň biri import-eksport amallaryny amala aşyrýan kiçi we orta telekeçilik üçin goşmaça mümkinçilikleri döretmek boldy. Gatnaşyjylar telekeçileriň arasynda göni işewür gatnaşyklary ösdürmegiň we amaly hyzmatdaşlygy giňeltmegiň möhümdigini bellediler.

Taraplar iki ýurduň bazarlary baradaky döwrebap maglumatlary alyşmaga we önümçilik hem-de söwda hyzmatdaşlygynyň täze görnüşlerini gözlemäge aýratyn üns bermegi ylalaşdylar. Geljekki hyzmatdaşlygyň uly ugurlary hökmünde dokma we himiýa senagaty, şeýle hem ulag-logistika pudagy bellenildi.

Geçirilen ara alyp maslahatlaşmalaryň netijeleri boýunça türkmen we ukrain taraplary telekeçilere göni aragatnaşyk saklamaga, anyk taslamalary ara alyp maslahatlaşmaga we özara bähbitli şertnamalary baglaşmaga mümkinçilik berjek yzygiderli B2B duşuşyklaryny geçirmek bilen gyzyklanýandyklaryny bildirdiler.

Şeýle çäreleri geçirmek Türkmenistanyň we Ukrainanyň işewür toparlarynyň arasyndaky gatnaşyklary mundan beýläk-de pugtalandyrmagyň möhüm gurallarynyň biri hökmünde görülýär.