5-nji martda Tokýo şäherinde däp bolan medeniýeti gorap saklamak we onuň ykdysady ösüşdäki ornuna bagyşlanan “Merkezi Aziýa + Ýaponiýa” formatyndaky 14-nji dialog geçirildi. Duşuşyga Ýaponiýanyň we Merkezi Aziýa ýurtlarynyň — Gazagystan, Gyrgyzystan, Täjigistan, Türkmenistan hem-de Özbegistan wekilleri gatnaşdylar.

Duşuşygy Ýaponiýanyň Daşary işler ministrligi, Ýaponiýanyň Global forumy we Halkara gatnaşyklary boýunça Ýapon forumy gurady. Gatnaşyjylar medeni mirasy gorap saklamagyň hem-de ony senagat ösüşinde, halkara hyzmatdaşlykda we medeni alyş-çalyşda peýdalanmagyň mümkinçiliklerini ara alyp maslahatlaşdylar. Dialogyň dowamynda bilermenler däp bolan senetçiligi ösdürmäge hem-de Merkezi Aziýa ýurtlarynyň medeniýetini halkara derejesinde öňe sürmäge gönükdirilen milli taslamalary we başlangyçlary hödürlediler.

Forum “Merkezi Aziýa + Ýaponiýa” başlangyjynyň çäklerinde alnyp barylýan hyzmatdaşlygyň dowamydyr we Tokýo beýannamasynda görkezilen ylalaşyklara laýyklykda geçirilýär. Ýapon tarapynyň bellemegine görä, medeni alyş-çalyş Ýaponiýa bilen Merkezi Aziýa ýurtlarynyň arasyndaky hyzmatdaşlygy pugtalandyrmakda möhüm orun eýeleýär.

Çeşme: www.orient.tm