Ýewropa Bileleşigi (ÝB) ösüp barýan, deňze çykalgasy bolmadyk ýurtlary (LLDC) goldamak maksady bilen maliýe, infrastruktura we söwda ulgamyna aýratyn ähmiýet berýän anyk strategiýany işläp düzdi. 

Awazada ýekşenbe güni geçirilen Birleşen Milletler Guramasynyň üçünji maslahatynyň (LLDC3) çäklerinde Merkezi Aziýa boýunça Ýewropa Bileleşiginiň ýörite wekili Eduard Stipraýs öz çykyşynda mälim etdi. Bu barada Türkmenistanyň resmi metbugaty habar berýär.

Diplomatyň aýtmagyna görä, Ýewropa Bileleşigi maliýeleşdirmäni durnukly ösüşiň esasy gurallarynyň biri hökmünde kabul edýär. “Maliýe ulgamlary päsgelçilikleri aradan aýyrmakda, infrastrukturany ösdürmekde we söwda mümkinçiliklerini giňeltmekde möhüm rol oýnaýar” diýip, Stipraýs belledi.

Ol Brýusseliň ulag aragatnaşygyny ýokarlandyrylmaga we täsirli ykdysadyýeti dünýä bazaryna goşmak boýunça taslamalara aýratyn ähmiýet berýändigini nygtady. Bu başlangyçlar deňsizligi azaltmaga we bazarlara elýeterliligi giňeltmäge gönükdirilendir.

“Biz geografik orny näçe tapawutly bolmagyna garamazdan, deňze çykalgasy bolmadyk ýurtlaryň ösüş mümkinçiliklerine deň derejede elýeterliligini üpjün edýän anyk başlangyçlary durmuşa geçirmäge ygrarlydyrys” diýip, Ýewropa Bileleşiginiň wekili sözüniň üstüni ýetirdi.

Birleşen Milletler Guramasynyň maglumatlaryna görä, umumy 32 sany ösüp barýan deňze çykalgasy bolmadyk ýurtlaryň 16-sy Afrikada, 10-sy Aziýada, 4-si Ýewropada we 2-si Latyn Amerikada ýerleşýär. Bu ýurtlarda ýaşaýan ilatyň sany 500 milliondan gowrak bolup, bu jahan ilatynyň takmynan 7%-ni düzýär.

Maglumat çeşmesi: Business Turkmenistan