Türkmenistanyň Demir ýol ulaglary ministrliginiň wekiliýeti iş sapary bilen Germaniýada bolup, halkara InnoTrans 2026 sergisine gatnaşýar. Saparyň möhleti 22–25-nji sentýabr aralygyny öz içine alýar we demir ýol pudagynyň öňdebaryjy kompaniýalarynyň ýolbaşçylary bilen birnäçe duşuşyklary geçirmek meýilleşdirilýär.

22-nji sentýabrda Türkmenistanyň wekiliýeti Techne Kirow GmbH, INFRA LLC, CRRC Nanjing Puzhen Co. Ltd, Alstom, Huawei Technologies Co. Ltd we Schwihag AG ýaly birnäçe kompaniýanyň sergi diwarlyklarynda gepleşikleri geçirdi. Iş maksatnamasy tamamlanandan soň, wekiliýet serginiň ekspozisiýasy bilen tanyşdy.

23-nji sentýabrda wekiliýet sergi meýdançasyndaky işlerini dowam etdirýär. Günüň maksatnamasynda serginiň ekspozisiýasyna baryp görmek, şeýle hem Vossloh AG, ArcelorMittal we System7 Railtechnology GmbH kompaniýalarynyň ýolbaşçylary bilen gepleşikleri geçirmek göz öňünde tutulýar. Günüň ikinji ýarymynda Beýik Britaniýanyň Ulag ministrliginiň (DfT) we Beýik Britaniýanyň Demir ýol senagaty assosiasiýasynyň (RIA) wekilleri bilen duşuşyklar, şeýle hem Pandrol kompaniýasy bilen gepleşikler meýilleşdirilýär.

24-nji sentýabrda voestalpine Railway Systems GmbH, SRT Srl, ARBZ we Kzeso, LLC kompaniýalarynyň ýolbaşçylary bilen duşuşyklary geçirmek meýilleşdirilýär. Şondan soň wekiliýet serginiň galan ekspozisiýalary bilen tanyşar.

Saparyň 25-nji sentýabrda tamamlanmagy meýilleşdirilýär.

InnoTrans — Berlinde geçirilýän we dünýäniň dürli ýurtlaryndan demir ýol ulaglary üçin hereket edýän düzümleri öndürijileri, infrastruktura çözgütlerini hödürleýän kompaniýalary hem-de demir ýol pudagynyň beýleki wekillerini bir ýere jemleýän halkara ulag tehnologiýalary sergisidir.