Türkmenistan ŞHG-ny Türkmenbaşy deňiz portunyň mümkinçiliklerini ulanmaga çagyrdy
Türkmenıstanyň Prezidenti Serdar Berdimuhamedow duşenbe güni Hytaýyň Týanszin şäherinde geçen “ŞHG+” sammitindäki çykyşynda Türkmenbaşy Halkara deňiz portunyň mümkinçiliklerine ünsi çekip, ýurduň bu köpugurly we kuwwatly terminalyň Şanhaý Hyzmatdaşlyk Guramasynyň bähbitlerine ulanylmagy baradaky dialoga taýýardygyny tassyklady.
Döwlet baştutanynyň aýtmagyna görä, bu köpugurly terminal, netijeli ulag we logistika geçelgesiniň döredilmeginde möhüm orun tutup biler. Bu barada Türkmenistanyň resmi metbugaty habar berýär.
Türkmenıstanyň Prezidenti öz çykyşynda Türkmenistan bilen ŞHG-niň arasyndaky hyzmatdaşlygyň ileri tutulýan ugurlary hökmünde ulag-logistika, kommunikasiýa, energetika we söwda ulgamlaryny kesgitledi.
Serdar Berdimuhamedow Hazarýaka we Hazarüsti ulag ugurlaryna aýratyn üns çekip, Türkmenistanyň we ŞHG-niň bu ugurdaky bähbitleriniň gabat gelýändigini aýtdy.
Häzirki wagtda Türkmenistanyň we ŞHG-niň gatnaşmagynda Gündogar — Günbatar we Demirgazyk — Günorta ugurlary boýunça giň logistika magistrallaryny döretmek üçin giň mümkinçilikler açylýar. Tagallalaryň we mümkinçilikleriň birleşdirilmegi, syýasy-diplomatik, ykdysady serişdeleriň herekete getirilmegi diňe bir hyzmatdaşlygymyzyň ösüşinde hil taýdan täze tapgyry alamatlandyrman, munuň özi iri we okgunly ösýän ykdysady zolaklary — Aziýa — Ýuwaş umman sebitini, Merkezi we Günorta Aziýany, Russiýany, Orta we Ýakyn Gündogary öz içine alýan, Ýuwaş ummandan Baltika deňzine çenli uzaýan bitewi geoykdysady giňişligi kemala getirmek üçin şertleri döretmäge ukyply bolar diýip, Türkmenıstanyň Prezidenti Serdar Berdimuhamedow belledi.
Türkmenıstanyň Prezidenti Şanhaý Hyzmatdaşlyk Guramasyna agza döwletleriň BMG-niň Baş Assambleýasynyň Türkmenistanyň Bitaraplygy hakyndaky Kararnamalarynyň, şeýle hem ýurdumyz tarapyndan teklip edilen BMG-niň birnäçe beýleki çözgütleriniň awtordaşy bolup çykyş edendiklerini we goldandyklary üçin minnetdarlyk bildirdi we guramanyň agzalaryny 2025-nji ýylyň 12 dekabrynda Aşgabatda Türkmenistanyň Bitaraplygynyň 30 ýyllygy mynasybetli geçiriljek dabaralara gatnaşmaga çagyrdy.
Şanhaý Hyzmatdaşlyk Guramasy (ŞHG) 2001-nji ýylda, ýewraziýa sebitinde howpsuzlygy berkitmek, ykdysady hyzmatdaşlygy ýokarlandyrmak we ynsanperwer gatnaşyklary giňeltmek maksady bilen döredildi. Bu guramanyň agzalaryna Gazagystan, Hytaý, Gyrgyzystan, Russiýa, Täjigistan, Özbegistan, Päkistan, Hindistan, Eýran we Belarusiýa ýurtlary girýär.
Maglumat çeşmesi: Business Turkmenistan
