Türkmenistan daşary işler ministri Moskwada rus kärdeşi bilen duşuşyk geçirdi

Türkmenistanyň Daşary işler ministri Raşid Meredow Moskwada rus kärdeşi Sergeý Lawrow bilen gepleşikler geçirdi. Duşuşyk ikitaraplaýyn gatnaşyklaryň berkidilmegine we dürli ugurlarda hyzmatdaşlygyň ösdürilmegine bagyşlandy. Bu barada Russiýa Federasiýasynyň DIM-i gepleşikleriň netijesi boýunça bilelikdäki metbugat        beýanatynda habar berdi.

Diplomatlar söwda-ykdysady ulgamyň, şeýle hem ulag, infrastruktura we energetika ugurlarynda hyzmatdaşlygy mundan beýläk-de çuňlaşdyrmaga bolan gyzyklanmalaryny beýan etdiler. Medeni-ynsanperwer ugur boýunça, rus-türkmen uniwersitetini döretmek, Puşkin adyndaky teatryň täze binasyny gurmak we bilelikdäki orta mekdepleriň sanyny artdyrmak ýaly taslamalar ara alnyp maslahatlaşyldy.

Taraplar Garaşsyz Döwletleriň Arkalaşygynyň çäklerinde hyzmatdaşlygy dowam etdirmegiň wajypdygyny nygtadylar. Aýratyn hem, oktýabr aýynda Tajigistanda GDA-nyň sammitiniň çäklerinde geçiriljek "Merkezi Aziýa+Russiýa" duşuşygynyň ikinji mejlisine görülýän taýýarlyk meselelerine garaldy. 

Gepleşikleriň gün tertibiniň içinde Hazaryň kenarýaka ýurtlarynyň ministrleriniň we ýokary derejedäki wekilleriniň duşuşyklary hem bar.

Duşuşygyň dowamynda ministrler iki ýurduň arasynda 30 ýyldan gowrak dowam edýän söwda-ykdysady gatnaşyklarynyň baý tejribesi Russiýa we onuň sebitleri bilen Türkmenistanyň arasyndaky gatnaşyklary mundan beýläk ösdürmegiň binýady bolup hyzmat edýändigini aýratyn bellediler.

Gepleşikler Türkmenistan bilen Russiýanyň arasyndaky strategik gatnaşyklary berkitmäge, söwda-ykdysady we medeni hyzmatdaşlygy giňeltmäge gönükdirildi.

Maglumat çeşmesi: Business Turkmenistan