Gahryman Arkadagymyzyň Balkan welaýatyna iş sapary: Halkara forumlar we Awaza üns merkezinde

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Balkan welaýatyna iş saparyny amala aşyrdy. Saparyň dowamynda 2026-njy ýylda ýurdumyzda geçirilmegi meýilleşdirilýän iri halkara çäreleriň taýýarlyk derejesine aýratyn üns berildi. Hazaryň kenarynda ýerleşýän desgalaryň we “Awaza” milli syýahatçylyk zolagynyň mümkinçilikleri bilen tanşan Milli Liderimiz bu künjegiň halkara forumlaryň, sergileriň hem-de möhüm duşuşyklaryň geçirilýän abraýly merkezine öwrülýändigini belledi. Şunda ähli desgalaryň ýokary halkara ülňülere laýyk gelmegi, sanly tehnologiýalaryň giňden ulanylmagy we degişli düzümleriň sazlaşykly işi möhüm wezipe hökmünde kesgitlenildi.

Gahryman Arkadagymyz dikuçarda Awazanyň çägindäki desgalary synlap, ulag-logistika ulgamynyň, daşky gurşawy goramagyň, energetika we senagat pudaklarynyň ýagdaýy bilen tanyşdy. Türkmenbaşy Halkara deňiz portunyň hem-de “Garabogazkarbamid” zawodynyň ýurduň eksport mümkinçiliklerini pugtalandyrmakdaky strategik ähmiýeti aýratyn nygtaldy. Saparyň dowamynda Balkan welaýatynyň we Hazaryň kenarýakasynyň milli ykdysadyýetimiziň ösüşinde, halkara hyzmatdaşlygyň giňeldilmeginde hem-de durnukly ösüş maksatlarynyň amala aşyrylmagynda möhüm orun eýeleýändigi aýdyň tassyklandy.

Çeşme: www.tdh.gov.tm