Aşgabat we Ýerewan Söwda öýlerini açmagyň mümkinçiliklerini maslahatlaşdylar

Türkmenistan bilen Ermenistan Aşgabatda we Ýerewanda Söwda öýlerini açmagyň mümkinçiliklerini ara alyp maslahatlaşdylar. Bu mesele sişenbe güni Aşgabatda Türkmenistanyň Söwda-senagat edarasynyň başlygy Mergen Gurdow bilen Ermenistanyň Türkmenistandaky ilçisi Arsen Awagýanyň arasynda geçirilen duşuşykda gozgaldy.

TSSE-niň metbugat gullugynyň habar bermegine görä, bu başlangyç işewür gatnaşyklary pugtalandyrmaga, ikitaraplaýyn haryt dolanyşygyny giňeltmäge we ýerli öndürijileriň daşary ýurt bazarlaryna çykmagyna ýardam etmäge gönükdirilendir.

Taraplar ýurtlaryň arasyndaky häzirki ykdysady we söwda gatnaşyklaryna ýokary baha berdiler hem-de ony giňeltmäge gyzyklanma bildirdiler.

Gepleşikleriň dowamynda iki ýurduň işewür toparlarynyň hyzmatdaşlygyny has-da işjeňleşdirmek, ikitaraplaýyn haryt dolanyşygyny artdyrmak we telekeçiligi ösdürmek bilen baglanyşykly meseleler ara alnyp maslahatlaşyldy.

Duşuşygyň ahyrynda taraplar özara bähbitli hyzmatdaşlygy giňeltmek boýunça işleri dowam etdirmäge taýýardygyny tassykladylar.

2024-nji ýylda Türkmenistan bilen Ermenistanyň arasyndaky söwda dolanyşyk $22 milliona barabar boldy.

Maglumat çeşmesi: Business Turkmenistan