Türkmenistan bilen BMG parahatçylyk we ynanyşmak boýunça dialogy berkidýärler
8-nji dekabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Birleşen Milletler Guramasynyň Baş sekretarynyň Ýörite wekili, Merkezi Aziýa üçin öňüni alyş diplomatiýasy boýunça BMG-niň Sebit merkeziniň ýolbaşçysy Kaha Imnadze bilen duşuşdy. Duşuşygyň dowamynda taraplar mähirli salamlaşyp, Türkmenistanyň BMG bilen hyzmatdaşlygynyň yzygiderli we durnukly häsiýete eýedigini belläp geçdiler. Ýurtimiziň ählumumy parahatçylygy, ynanyşmagy hem-de öňüni alyş diplomatiýasyny ilerletmekde edýän goşandy ýokary bahalandyryldy.
Söhbetdeşlikde Türkmenistanyň hemişelik Bitaraplygynyň 30 ýyllygynyň we Birleşen Milletler Guramasynyň döredilmeginiň 80 ýyllygynyň üstüni ýetirýän şanly seneleriň üstüniň-üstüne düşýändigi aýratyn nygtaldy. Şeýle-de, milli Liderimiziň öňe süren birnäçe möhüm başlangyçlarynyň – şol sanda 2025-nji ýylyň “Halkara parahatçylyk we ynanyşmak ýyly” hökmünde yglan edilmeginiň – aýratyn ähmiýete eýedigi görkezildi.
Taraplaryň belleýşi ýaly, ýylyň dowamynda ýurdumyzyň içinde-de, daşary ýurtlarda-da parahatçylygy pugtalandyrmaga hem-de durnukly ösüşi öňe sürmäge bagyşlanan köp sanly ösüşe gönükdirilen çäreler geçirildi. Söhbetdeşlikde ýakyn wagtda Aşgabat şäherinde geçiriljek halkara forumyna aýratyn üns berildi. Ol şu ýylyň jemleýji wakasy hökmünde dünýä gün tertibiniň möhüm meselelerini ara alyp maslahatlaşmak üçin netijeli mümkinçilik döreder.
Kaha Imnadze Türkmenistanyň Sebit merkeziniň işine berýän yzygiderli goldawyna tüýs ýürekden minnetdarlyk bildirip, uzak ýyllaryň dowamynda üstünlikli alnyp barylýan hyzmatdaşlygyň geljekde-de täze mazmun bilen baýlaşjakdygyna we Merkezi Aziýada durnuklylygy pugtalandyrmaga degişli bilelikdäki maksadlaryň mundan beýläk-de üstünlikli ýerine ýetiriljekdigine ynam bildirdi.
Çeşme: www.tdh.gov.tm
