Türkmenistanyň Prezidenti BSGG-nyň ýörite sylagyna mynasyp boldy

16-njy fewralda Türkmenistanyň Prezidenti Serdar Berdimuhamedow Bütindünýä Saglygy Goraýyş Guramasynyň Ýewropa sebiti edarasynyň direktory Hans Kluge bilen duşuşdy. Gepleşikleriň dowamynda döwlet Baştutanyna «Saglygy goraýyş ulgamynda parahatçylygy, agzybirligi we diplomatiýany ilerletmäge goşan goşandy üçin» atly ýörite sylag gowşuryldy.

Bu sylag Türkmenistanyň lukmançylyk diplomatiýasyny ösdürmek we saglygy goraýyş ulgamynda halkara hyzmatdaşlygy berkitmek boýunça alyp barýan işleriniň ykrar edilmeginiň nyşany boldy. Şeýle hem 2026-njy ýylda saglygy goramak şygary astynda geçirilýän Garaşsyz Döwletleriň Arkalaşygynda ýurduň başlyklyk etmegi mynasybetli gutlag sözleri aýdyldy.

Aşgabatdaky saparynyň çäginde Hans Kluge Ählumumy saglygy goraýyş diplomatiýasy boýunça ýokary derejeli dialoga gatnaşdy. Döwlet Baştutanynyň bellemegine görä, bu forum tejribe alyşmak we häzirki zaman howplaryna garşy saglygy goraýyş ulgamlarynyň durnuklylygyny ýokarlandyrmaga gönükdirilen hyzmatdaşlygy giňeltmek üçin möhüm meýdança bolar.

Çeşme: www.tdh.gov.tm